ಕಥೊಲಿಕ್‌ ಸಭಾ ಕುಳೂರು ಘಟಕಾಚೊ ರುಪ್ಯೋತ್ಸವ್‌ ಸಂಭ್ರಮ್‌ ನವೆಂವರಾಚಾ 20 ತಾರಿಕೆರ್‌ ಚಲ್ಲೊ. ಸಂಭ್ರಮ್‌ ಸಕಾಳಿಂ ಪವಿತ್ರ್‌ ಮಿಸಾಚಾ ಬಲಿದಾನಾ ಸವೆಂ ಪ್ರಾರಂಭ್‌ ಕೆಲೊ. ಸಾಂದ್ಯಾಂನಿ ಲಿತುರ್ಜಿ ಚಲವ್ನ್‌ ವ್ಹೆಲಿ.
ರುಪ್ಯೋತ್ಸವ್‌ ಸಂಭ್ರಮ್‌ ಸಾಂಜೆರ್‌ ಇಗರ್ಜೆಚಾ ಉಗ್ತ್ಯಾ ಮೈದಾನಾರ್‌ ಚಲ್ಲೊ. ವೆದಿಚೆರ್‌ ಫಿರ್ಗಜೆಚೊ ವಿಗಾರ್‌ ತಶೆಂತ್‌ ಕಾರ್ಯಚೊ ಅಧ್ಯಕ್ಷ್‌ ಮಾ|ಬಾ| ವಿಕ್ಟರ್‌ ವಿಜಯ್‌ ಲೋಬೊ, ಕಥೊಲಿಕ್‌ ಸಭಾ ವಾರಾಡ್ಯಾಚೆ ಆತ್ಮೀಕ್‌ ನಿರ್ದೇಶಕ್‌ ಮಾ|ಬಾ| ಜೋನ್ ವಾಸ್‌, ಕೇಂದ್ರಿಯ್‌ ಅಧ್ಯಕ್ಷ್‌ ಮಾನೆಸ್ತ್‌ ಆಲ್ವಿನ್‌ ಡಿಸೋಜ, ವಾರಾಡೊ ಅಧ್ಯಕ್ಷ್‌ ಮಾನೆಸ್ತಿಣ್‌ ಐಡಾ ಫುರ್ಟಾಡೊ, ಫಿರ್ಗಜ್‌ ಗೊವ್ಳಿಕ್‌ ಪರಿಷದೆಚೊ ಉಪಾಧ್ಯಕ್ಷ್‌ ಮಾನೆಸ್ತ್‌ ಅರುಣ್‌ ರೋಶನ್‌ ಡಿಸೋಜ, ಕಾರ್ಯದರ್ಶಿ ಸುನಿತಾ ಡಿಸೋಜ, ಫಿರ್ಗಜ್‌ ಗೊವ್ಳಿಕ್‌ ಪರಿಷದೆಚಾ ಅಯೋಗಾಂಚೊ ಸಂಯೋಜಕ್‌ ಡಾ| ವಿನಯ್‌ ರಜತ್‌ ಡಿಸೋಜ, ಕುಳೂರು ಹೈಸ್ಕೂಲಾಚೊ ಮುಖೆಲ್‌ ಮೆಸ್ತ್ರಿ ಮಾ|ಬಾ| ಅರುಣ್‌ ಜೆ. ಮೆಂಡೊನ್ಸಾ, ಸಮುದ್ರ ತಾರೆ ಕಾನ್ವೆಂಟಾಚಿ ವ್ಹಡಿಲ್ನ್‌ ಸಿ| ಜಾನೆಟ್‌ ಲೋಬೊ, ಉದ್ಯಮಿ ಮಾನೆಸ್ತ್‌ ಅಲೋಶಿಯಸ್‌ ಲೊಯ್ಸೆಲ್‌ ಡಿಸೋಜ, ಘಟಕಾಚೊ ಸ್ಥಾಪಕ್‌ ಅಧ್ಯಕ್ಷ್‌ ಮಾನೆಸ್ತ್‌ ರೋಯ್ಸ್‌ ಡಿಸೋಜ, ಘಟಕಾಚಿ ಅಧ್ಯಕ್ಷ್‌ ಮಾನೆಸ್ತಿಣ್‌ ಫಿಲೋಮಿನಾ ವೇಗಸ್‌, ಕಾರ್ಯದರ್ಶಿ ಶ್ರೀಮತಿ ಲತಾ ಸ್ಯಾಂಡ್ರ ಡಿಸೋಜ, ಕಾರ್ಯಚಿ ಸಂಚಾಲಕಿ ಮಾನೆಸ್ತಿಣ್‌ ಲವೀನಾ ಡಿಸೋಜ ಹಾಜರ್‌ ಆಸ್‌ಲ್ಲಿಂ.
ಕಾರ್ಯದರ್ಶಿ ಶ್ರೀಮತಿ ಲತಾ ಸ್ಯಾಂಡ್ರ ಡಿಸೋಜಾನ್‌ ಘಟಕಾನ್‌ 25 ವರ್ಸಾಂನಿ ಕೆಲ್ಲ್ಯಾ ವಾವ್ರಾಚಿ ಝಳಕ್‌ ಲೊಕಾ ಮುಕಾರ್‌ ದವರ್ಲಿ.
ಕುಳೂರ್‌ ಘಟಕಾಂತ್‌ ಪಾಟ್ಲ್ಯಾ 25 ವರ್ಸಾಂ ಥಾವ್ನ್‌ ಸೆವಾ ದಿಲ್ಲ್ಯಾ ಸರ್ವ್‌ ಅಧ್ಯಕ್ಷ್‌ ಆನಿ ಕಾರ್ಯದರ್ಶಿಂಕ್ ಮಾನ್‌ ಪಾಟಯ್ಲೊ.
ಕಥೊಲಿಕ್‌ ಸಭಾ ಕುಳೂರು ಘಟಕಾಕ್‌ ವೆದಿರ್‌ ಆಸ್‌ಲ್ಲ್ಯಾ ಮಾನಾಚಾ ಸಯ್ರಾನಿ ಅಭಿನಂದನ್‌ ಪಾಟವ್ನ್‌ ತಾಂಚೊ ಸಂದೇಶ್‌ ದಿಲೊ.
ವಾರಾಡೊ ಅಧ್ಯಕ್ಷ್‌ ಮಾನೆಸ್ತಿಣ್‌ ಐಡಾ ಫುರ್ಟಾಡೊ ತಾಂಚೊ ಸಂದೇಶ್‌ ದಿವ್ನ್‌, ಸೆವಾ ದಿಲ್ಲ್ಯಾ ಸರ್ವ್‌ ಅಧ್ಯಕ್ಷ್‌, ಹುದ್ದೆದಾರ್‌ ಆನಿ ಸರ್ವ್‌ ಸಾಂದ್ಯಾಂಕ್‌ ಅಭಿನಂದನ್‌ ಪಾಟಯ್ಲೆಂ.
ಕಥೊಲಿಕ್‌ ಸಭಾ ವಾರಾಡ್ಯಾಚೆ ಆತ್ಮೀಕ್‌ ನಿರ್ದೇಶಕ್‌ ಮಾ|ಬಾ| ಜೋನ್ ವಾಸ್‌ ತಾಂಚೊ ಸಂದೇಶ್‌ ದಿವ್ನ್‌ ಯುವಜಣಾಂಕ್‌ ಕಥೊಲಿಕ್‌ ಸಭೆಕ್‌ ಭರ್ತಿ ಜಾಂವ್ಕ್‌ ಪ್ರೋತ್ಸಾಹ್‌ ದಿಲೊ.
ಕೇಂದ್ರೀಂಯ್‌ ಅಧ್ಯಕ್ಷ್‌ ಮಾನೆಸ್ತ್‌ ಆಲ್ವಿನ್‌ ಡಿಸೋಜ ಹಾಣಿಂ ಘಟಾಕಾಚಾ ಸರ್ವ್‌ ಸಾಂದ್ಯಾಂನಿ ಕೆಲ್ಲ್ಯಾ ವಾವ್ರಾಕ್‌ ಶಭಾಸ್ಕಿ ಪಾಟಯ್ಲಿ.
ಫಿರ್ಗಜೆಚೊ ವಿಗಾರ್‌ ತಶೆಂತ್‌ ಕಾರ್ಯಚೊ ಅಧ್ಯಕ್ಷ್‌ ಮಾ|ಬಾ| ವಿಕ್ಟರ್‌ ವಿಜಯ್‌ ಲೋಬೊ ಹಾಣಿಂ ತಾಂಚೊ ಸಂದೇಶ್‌ ದಿವ್ನ್‌, ರುಪ್ಯೋತ್ಸವಾ ಸಂದರ್ಭಿ ಕಥೊಲಿಕ್‌ ಸಭೆನ್‌ ವಿವಿಧ್‌ ಕಾರ್ಯಕ್ರಮ ಭೋವ್‌ ಅರ್ಥಭರಿತ್‌ ರಿತಿನ್‌ ಮಾಂಡುನ್‌ ಹಾಡ್ಲ್ಯಾತ್‌, ಅಶೆಂ ತಾಂಚೊ ಸಂತೊಸ್‌ ಉಚಾರ್ಲೊ.
“ಮೆಮೊರಿ ಆನಿ ಸಾಂಗಾತಿ” ಪಂಗ್ಡಾಚಾ ಮೆಲ್ಲು ವಲೆನ್ಸಿಯಾ ಆನಿ ರಿಚ್ಚಿ ವಲೆನ್ಸಿಯಾ ಹಾಂಚಾ ಕಲಾಕಾರಾಂಚಾ ಫೊಕಾಣಾಂನಿ ಸರ್ವಾಂಚಿ ಕಾಳ್ಜಾಮನಾಂ ಖುಶಾಲ್‌ಭರಿತ್‌ ಕೆಲಿಂ.
ಫಿರ್ಗಜ್‌ಗಾರಾಂನಿ ಸಂಗೀತ್‌ ಆನಿ ನಾಚ್ಪಾದ್ವಾರಿಂ ಮನೋರಂಜನ್‌ ಕಾರ್ಯೆಂ ಚಲವ್ನ್‌ ವೆಲೆಂ. ಘಟಕಾಚಾ ಸಾಂದ್ಯಾಂನಿ ರುಪ್ಯೋತ್ಸವ್‌ ಸಂದರ್ಭಿ ಉಲ್ಲಾಸಾಚೆಂ ಗೀತ್‌ ಗಾಯ್ಲೆಂ.
ಘಟಕಾಚಿ ಅಧ್ಯಕ್ಷ್‌ ಮಾನೆಸ್ತಿಣ್‌ ಫಿಲೋಮಿನಾ ವೇಗಸ್‌ ಹಿಣೆಂ ಜಮ್ಲೆಲ್ಯಾ ಸರ್ವಾಂಕ್‌ ಸ್ವಾಗತ್‌ ಕೆಲೊ. ಕಾರ್ಯಾಚಿ ಸಂಚಾಲಕಿ ಮಾನೆಸ್ತಿಣ್‌ ಲವೀನಾ ಡಿಸೋಜ ಹಿಣೆಂ ಧನ್ಯವಾದ್‌ ಪಾಟಯ್ಲೆಂ.
ಘಟಕಾಚೊ ಆಮ್ಚೊ ಸಂದೇಶ್‌ ಪ್ರತಿನಿಧಿ ಮಾನೆಸ್ತಿಣ್‌ ಸವಿತಾ ವೇಗಸ್‌ ಹಿಣೆಂ ಭೋವ್‌ ಅರ್ಥಭರಿತ್‌ ರಿತಿನ್‌ ಸಗ್ಳ್ಯಾ ಕಾರ್ಯಾನಿರ್ವಹಣ್‌ ಕೆಲೆಂ. ಅಶೆಂ ಜೆವ್ಣಾ ಸವೆಂ ಕಾರ್ಯೆಂ ಸಪ್ಲೆಂ.